Conclusión

Dexémonos de pleitos de ifantes de Carrión,
de lo que an preso mucho an mal sabor ;

fablemos nos d’ aqueste que en buen ora naçió.
Grandes son los gozos en Valençia la mayor,
porque tan ondrados foron los del Canpeador.
Prisos a la barba Roy Díaz so señor :
«Grado al rey del çielo, mis fijas vengadas son !

«Agora las ayan quitas heredades de Carrión !
«Sin vergüença las casaré o a qui pese o a qui non.»

Andidieron en pleytos los de Navarra e de Aragón,
ovieron su ajunta con Alfons el de León.
Fizieron sos casamientos don Elvira e doña Sol ;

los primeros foron grandes, mas aquestos son mijores ;

a mayor ondra las casa que lo que primero fo.

Veed qual ondra creçe al que en buen ora naçió,

quando señoras son sues fijas de Navarra e de Aragón.

Oy los reyes d’ España sos parientes son,
a todos alcança ondra por el que en buena naçió.
Passado es deste sieglo mió Çid de ValenÇia señor

el día de cinquaesma ; de Cristus aya perdón !

Assí ffagamos nós todos justos e peccadores!

Estas son las nuevas de mió Çid el Canpeador ;
en este logar se acaba esta razón.