El Cid reclama tres mil marcos

Luego se levantó mió Çid el Campeador;

«Grado al Criador e a vos, rey señor !

«ya pagado so de mis espadas, de Colada e de Tizón.
«Otra rencura he de ifantes de Carrión:
«quando sacaron de Valençia mis fijas amas a dos,
«en oro e en plata tres mill marcos les dío;

«yo faziendo esto, ellos acabaron lo so;

«denme mios averes, quando mios yernos non son.»

Aquí veriedes quexarse ifantes de Carrión !
Dize el comde don Remond: «dezid de ssí o de no.»
Essora responden ifantes de Carrión:

«Por essol diemos sus espadas al Çid Campeador,
«que al no nos demandasse, que aquí fincó la boz.»
Allí les respondió el comde don Remond:
«Si ploguiere al rey, assí dezimos nos:
«a lo que demanda el Çid quel recudades vos.»
Dixo el buen rey: «assí lo otorgo yo.»

Levantós en pie el Çid Campeador;

«Dcstos averes que vos di yo,
«si me los dades, o dedes dello razón.»

Essora salien aparte ifantes de Carrión ;

non acuerdan en conssejo, ca los averes grandes son:

espesos los han ifantes de Carrión.
Tornan con el conssejo e fablavan a sso sabor:

«Mucho nos afinca el que Valençia gañó.

«quando de nuestros averes, assíl prende sabor ;

«pagar le hemos de heredades en tierras de Carrión.»

Dixieron los alcaldes quando manfestados son :
«Si esso ploguiere al Çid, non gelo vedamos nos;

«mas en nuestro juvizio assi lo mandamos nos,

«que aquí lo enterguedes dentro en la cort.»
A estas palabras fabló rey don Alfons:

«Nos bien la sabemos, aquesta razón,
«que derecho demanda el Çid Campeador.

«Destos tres mil marcos los dozientos tengo yo ;

«entramos me los dieron ifantes de Carrión.

«Tornárgelos quiero, ca tan desfechos son.

«enterguen a mió Çid el que en buen ora naçió;
«quando ellos los an a pechar, non gelos quiero yo.»

Ferrand Gonçálvez odredes qué fabló :
«averes monedados non tenemos nos.»

Luego respondió el conde don Remond :

«el oro e la plata espendiésteslo vos ;

«por juvizio lo damos antel rey don Alfons:
páguenle en apreçiadura e préndalo el Campeador.»
Ya vieron que es a fer ifantes de Carrión.

Veriedes aduzir tanto cavallo corredor,

tanta gruessa mula, tanto palafré de sazón.

tanta buena espada con toda guarnizón ;
recibiólo mió Çid commo apreçiaron en la cort.

Sobre los dozientos marcos que tenía el rey Alfons
pagaron los ifantes al que en buen ora nació;
enpréstanles de lo ageno, que non les cumple lo so.
Mal escapan jogados, sabed, desta razón.