Alfonso pone fecha a los enfrentamientos

Dixo el rey: «Fine esta razón;

«non diga ninguno della más una entençión.
«Cras sea la lid, quando saliere el sol,

«destos tres por tres que rebtaron en la cort.»
Luego fablaron ifantes de Carrión:

«Dandos, rey, plazo, ca cras seer non puode.

«Armas e cavallos diémoslos al Canpeador,
«nos antes abremos a ir a tierras de Carrión.»

Fabló el rey contral Campeador :

«sea esta lid o mandáredes vos.»

En essora dixo mió Çid: «no lo faré, señor;

«más quiero a Valençia que tierras de Carrión.»
En essora dixo el rey : «Aosadas, Campeador.

«Dadme vuestros cavalleros con todas guarnizones.

«vayan comigo, yo seré el curiador;

«yo vos lo sobrelievo, commo a buen vassallo faze señor,

»que non prendan fuerça de comde nin de ifançón.
«Aquí les pongo plazo de dentro en mi cort.

«a cabo de tres sedmanas, en begas de Carrión.

«que fagan esta lid delant estando yo ;

«quien non viniere al plazo pierda la razón,

«desí sea vençido y escape por traydor.»
Prisieron el judizio ifantes de Carrión.

Mió Çid al rey las manos le besó :

«Estos mios tres cavalleros en vuestra mano son,

«d’ aquí vos los acomiendo commo a rey e a señor.

«Ellos son adobados pora cumplir todo lo so ;
«ondrados me los enbiad a Valençia, por amor del Criador !»

Essora respuso el rey: «assi lo mande Dios!»

Allí se tollió el capiello el Çid Campeador,

la cofia de rançal que blanca era commo el sol,

e soltava la barba e sacóla del cordón.
Nos fartan de catarle quantos ha en la cort.

Adeliñó a comde don Anrric e comde don Remond;

abraçólos tan bien e ruégalos de coraçón

que prendan de sos averes quanto ovieren sabor.

A essos e a los otros que de buena parte son,
a todos los rogava assí commo han sabor ;

tales i a que prenden, tales i a que non.

Los dozientos marcos al rey los soltó ;

de lo al tanto priso quant ovo sabor.

«Merçed vos pido, rey, por amor del Criador !
«Quando todas estas nuevas assí puestas son.

«beso vuestras manos con vuestra graçia, señor,

«e irme quiero pora Valençia, con afán la gané yo.»