La conquista de Valencia

En tierra de moros prendiendo e ganando,
e durmiendo los días e las noches tranochando,
en ganar aquellas villas mió Çid duró tres años.

A los de Valençia escarmentados los han.

non osan fueras exir nin con él se ajuntar;

tajávales las huertas e fazíales grand mal,

en cada uno destos años mió Çid les tollió el pan.

Mal se aquexan los de Valençia que non sabent ques far.
de ninguna part que sea non les viníe pan;

nin da conssejo padre a fijo, nin fijo a padre.

nin amigo a amigo nos pueden consolar.

Mala cueta es, señores, aver mingua de pan,

fijos e mugieres veer los murir de fanbre.
Delante veyen so duelo, non se pueden huviar,

por el rey de Marruecos ovieron a enbiar;

con el de los Montes Claros avíe guerra tan grand,

non les dixo consejo, nin los vino huviar.
Sopólo mió Çid, de coraçón le plaz ;
salió de Murviedro una noch a trasnochar

amaneció a mió Çid en tierras de Mon Real.

Por Aragón e por Navarra pregón mandó echar,
a tierras de Castiella enbió sos menssajes:
Quien quiere perder cueta e venir a rritad,
viniesse a mío Çid que a sabor de cavalgar;
çercar quiere a Valençia pora cristianos la dar:

«quien quiere ir comigo cercar a Valençia.

«todos vengan de grado, ninguno non ha premia,

«tres días le speraré en Canal de Çelfa.»

Esto dixo mió Çid el Campeador leal.
Tornávas a Murviedro, ca él ganada se la a.
Andidieron los pregones, sabet, a todas partes,
al sabor de la ganançia, non lo quieren detardar,
grandes yentes se le acojen de la buena cristiandad.

Sonando van sus nuevas todas a todas partes;

mas le vienen a mió Çid, sabet, que nos le van ;

creçiendo va riqueza a mió Çid el de Bivar;

quando vido las gentes juntadas, compeçós de pagar.

Mió Çid don Rodrigo non lo quiso detardar,

adeliñó pora Valençia e sobrellas va echar,

bien la çerca mió Çid, que non i avía hart;
víédales exir e viédales entrar.
Metióla en plazdo, si les viniessen huviar.

Nueve meses complidos, sabet, sobrella yaz,
quando vino el dezeno oviérongela a dar.

Grandes son los gozos que van por es logar

quando mió Çid gañó a Valençia e entró en la çibdad.

Los que foron de pie cavalleros se fazen ;

el oro e la plata ¿quien vos lo podrie contar ?
Todos eran ricos quantos que allí ha.

Mió Çid don Rodrigo la quinta mandó tomar,

en el aver monedado treynta mill marcos le caen,

e los otros averes ¿quien los podrié contar?

Alegre era el Campeador con todos los que ha,
quando su seña cabdal sedié en somo del alcáçer.

Ya folgava mió Çid con todas sus conpañas:
aquel rey de Sevilla el mandado llegava,
que presa es Valencia, que non gela enparan,
vino los veer con treynta mill de armas.
Aprés de la uerta ovieron la batalla,

arrancólos mió Çid el de la luenga barba.
Fata dentro en Xátiva duró el arrancada,
en el passar de Xúcar i veriédes barata,
moros en arruenço amidos bever agua.

Aquel rey de Sevilla con tres colpes escapa.
Tornado es mió Çid con toda esta ganançia
Buena fo la de Valençia quando ganaron la casa,
mas mucho fue provechosa, sabet, esta arrancada:
a todos los menores cayeron çient marcos de plata.

Las nuevas del cavallero ya veedes do llegavan.